Donald Trump yabwiye abari mu myiyamamazo ko yasavye ko akariro ko gupima covid-19 kagabanuka

Insiguro y’isanamu,

Perezida Donald Trump yatanguriye imyiyamamazo ku wa 20/06/2020 mu gisagara ca Tulsa i Oklahoma

Umukuru w’igihugu ca Leta Zunze Ubumwe za Amerika Donald Trump yaraye yuguruye ibikorwa vy’imyiyamamazo ariko ikaba yitabwe n’inkehwa, ibitari vyitezwe.

Mu ntango z’iyi ndwi, Bwana Trump yari yari yigamvye ko hafi umuliyoni w’abantu bari biyandikishije ngo bashobore kwitabira iyo myiyamamazo yabereye mu gisagara ca Tulsa mu ntara ya Oklahoma.

Hagati aho, ico kibanza gisanzwe gifise ibibanza 19.000 nta n’uko yanegereje ico gitigiri mu gihe yari yiteze ko abantu bashobora kurenga gushika n’aho hategurwa n’ibindi bibanza hanze y’ikibuga.

Mu gihe hari amakenga kuri iyo myiyamamazo ibaye mu gihe ico gihugu gihanzwe n’umugera wa coronavirus, Bwana Trump yafashe umwanya muremure avuga kuri ico kiza.

Mw’ijambo yavuze mu nyuma akabifata nk’ukuyayata, Trump yabwiye isinzi ryari aho ko yasavye ababijejwe kugabanya umurindi wo gupima Covid-19 kubera abenshi muri bo basanga baranduye.

Avuga ko igikorwa co gupima ari “inkota”.

Ati: Ehe ndabereke ikibi kirimwo: iyo uriko upima ku rugero runini gutyo, uzokwama uronka abantu benshi, kandi uzoronka benshi banduye”.

“Rero nababwiye nti ‘gabanya akariro ko gupima’. Barapima bakaguma bapima!”

Insiguro y’isanamu,

Imyiyamamazo ya Trump yitabwe n’abantu imparurwa

Abinjira muri iyo myiyamamazo bose, bategerezwa gutera igikumu ku rwandiko rwo kwemeza ko Trump ata ruhara azoba afise mu gihe hogira abandurira muri yo.

Aho hari haciye amasaha makeya imbere y’uko ibikorwa bitangura, abategetsi bavuga ko batandatu mu bajejwe gutegura iyo myiyamamazo bari bapimwe bagasanga baranduye.

Hagati aho, ntibiboneka neza igituma abitavye iyo myiyamamazo bari bakeya ugereranije n’abari bitezwe.

Trump yagereranije abashoboye kwinjira muri yo n'”abarwanyi” , maze yifatira mu gahanga ibimenyeshamakuru n’abari mu myiyerekano yo kwiyamiriza ivanguramoko rikorerwa abirabure ko ari bo batumye abanywanyi biwe batitaba.

Avuga kuwo bahiganwa wo mu mugambwe w’aba Democrates Joe Biden, Bwana Trump yamwise “icitso c’akarwi k’abantu b’intagondwa”.

Hafi y’ahariko harabera iyo myiyamamazo harabaye imishamirano ariko mito cane ataco yononye.

Kuva Amerika yinjira muri ca kiringo ca guma mu rugo kubera Coronavirus, iyo myiyamamazo niryo koraniro rya mbere rinini ribereye mu kigo, ikaba ibaye mu gihe ibiharuro vy’abayandura muri iyo ntara ya Oklahoma bigenda vyiyongera.

Mu gihugu cose, abarenga imiliyoni 2.2 nibo bamaze kwandura uwo mugera, abandi barenga 119.000 bakaba baritavye Imana.

Source link

Leave a comment